෴ පෙම් ලෝකේ ගිනි දැල්ල ෴

                

ජෝතිපාල නැවත කියවමු තුන්වන කොටස

දසවසරට ස්ව තන්ත්‍ර ගී හතරයි

ජෝතිපාල නැවත කියවමු  ලිපි මාලාවෙන් අපේක්ෂා කරන්නේ ගායන ශිල්පියකු වශයෙන්  ජෝතිපාල පිළිබඳව අප වටහා නොගත් එහෙත් පොදු ජනතාව වටහාගත් සංගීත සංස්කෘතියේ අරුත විමසා බලන්නට  ය. එමගින් ජෝතිපාල අනුගමනය කළ සංගීත ශෛලිය  සහ ඔහුගේ සංගීත භාවිතය තුළ ඔහු නියෝජනය කළ කලාව කුමක්ද යන්න නැවත විමසා බලන්නට ය. 

මේ ලිපි මාලාව ඉතා දීර්ඝ එකක් වුවද,  අප තවම සිටින්නේ ජෝතිපාල ගී ගැයීම ඇරඹූ ඔහුගේ  පළමු දශකය තුළ ය. එනම් 1956 -1966 දශකය තුළ ය. මේ දශකය තුළ ජෝතිපාල චිත්‍රපට පසුබිම් ගායකයෙක් වශයෙන් ස්ථාවරත්වයක් ගොඩ නගා ගත්තද ඔහුට දශකයක් තුළ ස්වතන්ත්‍ර ගී තනුවලට ගී ගැයීමට ලැබෙන්නේ ගීත හතරක් හෝ පහකටත් අඩුවෙනි. එහෙත් මේ කාලය තුළ ඔහු ගැයූ  හින්දි සහ දෙමල කොපි ගීත විශාල ප්‍රමාණයක් චිත්‍රපට පසුබිම් ගී වශයෙන් බිහිවිය. එසේ වුවත් මේ දශකයේ ජෝතිපාල ගැයූ ස්වතන්ත්‍ර ගීත නිර්මාණ සහ ඒ ගීත සඳහා ඔහුගෙන් ලද දායකත්ව කෙබඳු දැයි විමසා බැලිම අද අස්වැන්නේ අපේක්ෂාව යි.

1956 – 66 දශකය තුළ ලංකාවේ බිහිවු චිත්‍රපට වලින් හරි අඩකටත් වැඩි ප්‍රමාණයක් ඉන්දියානු චිත්‍රපට අධ්‍යක්ෂකවරුන් විසින් නිර්මාණය කරන ලද ඒවා ය. එසේත් නැත්නම් හඬ කවන ලද ඉන්දියානු චිත්‍රපට ය. ඒ නිසාම ඒ චිත්‍රපටවලට සංගීතය සැපයූ වේ ඉන්දියානු සංගිතඥයන් විසිනි. මේ කාලය තුළ  දේශීය සිනමාව වෙනුවෙන් පෙනී සිටින්නට ඉඩ ලැබුණේ චිත්‍රපට අධ්‍යක්ෂවරුන් දෙතුන් දෙනෙකුට පමණි. ඔවුන්ගේ එම චිත්‍රපටවල සංගීතය සහ ගී තනු නිර්මාණය කරන ලද්දේ ලාංකීය සංගීතඥයන් විසිනි.

ඉන්දියන් සංගිතඥයන් කළේ හින්දි සහ දෙමළ ගී තනු අනුව කොපි කල ගීත මාලාවක් සිංහල චිත්‍රපටවලට සැපයීම ය. දේශිය සංගීතඥයන්ට ඉඳහිට හෝ සංගීතය සැපයීමට ලැබුණ  චිත්‍රපටවලටද කොපි ගීත දුසිම් ගණනින් ඇතුල් කිරීමට සිදු වූයේ ඔවුන්ගේ වරදින් නොව,  චිත්‍රපට නිෂ්පාදකයාගේ කැමැත්ත අනුවය.  චිත්‍රපට නිෂ්පාදකයාගේ බලාපොරොත්තුව ඉටු කිරීම හැර චිත්‍රපට අධ්‍යක්ෂකට මෙන්ම සංගිතඥයාටද ගත හැකි අන් මගක් නොතිබුණි. ඒ නිසාම දේශීය චිත්‍රපට අධ්‍යක්ෂකවරු මෙන්ම සංගීත අධ්‍යක්ෂකවරුද  චිත්‍රපට නිෂ්පාදකවරු ඉදිරියේ අසරණ වූහ.

කෙසේ වුවත්, ඉන්දියන් සංගිතඥයන් අතරින්  සදාජ් හුසේන් පමණක් සිංහල ස්වත්ත්‍ර ගීත නිර්මාණය කිරිමට පෙළඹීම මේ යුගයේ වැදගත් සිදුවීමකි.  ඔහු උතුරු ඉන්දියානු සංගීතඥයෙක් වුවද ලංකාවේ සංගීතය පිළිබඳව වැඩි උනන්දුවක් දැක්වීම නිසා ඔහුගේ ස්වතන්ත්‍ර  ගී තනු සහ සංගීත නිර්මාණ සියල්ල  සිංහල සිනමාවට ආලෝකය ගෙන දුන්නේ ය.

මේ යුගයේ සිංහල සිනමාවේ ස්වතන්ත්‍ර   ගී තනු නිර්මාණය කිරීමේ විශිෂ්ඨයෙකු වූ ෂෙල්ටන් ප්‍රේමරත්න වැනි සංගීතවේදීන්ට පවා  කරට කර හැපෙමින් ඉන්දීය සංගීතඥයන් සමග දස්කම් දක්වන්නට ලැබුණේ ඉතාම අල්ප වශයෙනි. එසේ වුවද ෂෙල්ටන් ප්‍රේමරත්නයන් ඒ යුගයේ සංගීතය සැපයූ “එකමත් එක රටක, මා ආලේ කළ තරුණිය  සහ වන මල” වැනි චිත්‍රපටවලට  ඔහු හැදූ ස්වන්ත්‍ර ගී තනු සියල්ල අපතේ ගිය බවත්, ඒ එසේ වූයේ ඒ  ගීත ලංකාවේදී පටිගත කිරීම්වල තිබූ  දුර්වලතාවයන්  බව මහාචාර්ය සුනිල් ආරියරත්න මහතා සඳහන් කරයි.

ගැහැනු ගැට චිත්‍රපට සදහා ෂෙල්ටන් ප්‍රේමරත්නයන් නිර්මාණය කළ ගී තනු ඉතාමත් මිහිරි ගී තනු වූවා සේ ම ඒවා ස්වතන්ත්‍ර ගී තනු විය. ගීත 10 කින් යුතුව 1959 දි තිරගත වූ ගැහැනු ගැට චිත්‍රපටය සදහා ෂෙල්ටන් ප්‍රේමරත්නයන් මුල් වරට එච්. ආර්. ජෝතිපාල දායක කරගත්තේ ය. ඒ ගැහැනු ගැට චිත්‍රපටයේ යුග ගීතයක් සදහා ය.  සහාය ගායනයෙන් දායක වූයේ ඇන්ජලින් ද ලැනරෝල් ( ඇන්ජලින් ගුණතිලක) ගායන ශිල්පිණියයි. ෂෙල්ටන් ප්‍රේමරත්නයන් සිය චිත්‍රපටය සදහා නිර්මාණය කළ “ ආලේ මිහිර පෙන්නා” ගීතය එදා මෙදා තුර ජෝතිපාල - ඇන්ජලීන් ගැයූ ගී අතර ඉතාමත් රසවත් අනගි සංගිත සංයෝජනයකින් යුත් ස්වතන්ත්‍ර ගීයකි.

ෂෙල්ටන් ප්‍රේමරත්නයන් චිත්‍රපට සේම වේදිකා නාට්‍ය රැසක සංගීතය අධ්‍යක්ෂණය කළ අති දක්ෂ සංගීත වේදියෙකි. ඔහු අතින්  සංගීත නිර්මාණය වූ ජනප්‍රිය  සරල ගී රැසකි. ‍ෂෙල්ටන් ප්‍රේමරත්නයන් සංගීතය සැපයූ වේදිකා නාට්‍ය අතර හෙන්රි ජයසේනගේ “හුණුවටයේ කතාව” සුවිශේෂී නාට්‍යයක් වෙයි. ෂෙල්ටන් ප්‍රේමරත්යන් මේ වන විට ඕස්ට්‍රේලියාවේ මෙල්බර්න් නුවර පදිංචිව සිටී. ඔහු  එරට ශ්‍රී ලාංකික දරු දැරියන්ට සංගීත දැනුම බෙදා දෙන  සංගීතවේදියෙක් බවද කෙටියෙන් හෝ සදහන් කරමි. මේ ඔහු විසින් නිර්මාණය කළ ජෝතිපාල - ඇන්ජලින් ගැයූ ඒ මියුරු ගීයයි.

ආලේ මිහිර පෙන්නා -  සියොතුන් නාද දෙන්නා

මලිති ගිරා ළිහිණින් - පෙම් ගී ගයන්නා

මල් පිපිලා තුරුලිය - මාරුතේ සැලෙන්නා... හෝ... මේ..

ආලේ මිහිර පෙන්නා -  සියොතුන් නාද දෙන්නා

පොකුණු ජලේ සියපෙති පිපිලා දිලෙන්නා

පිල් විදහා මොණරුන්  ඒ බලා නටන්නා .. ඕ..

මුව පැටවුන් හා රඟන නිදැල්ලේ.. ඕ..

කුරුලු කතා ඇසේ අසල කැදැල්ලේ

ගිජිඳුන්ගෙ ආලෙන් වන මල් සිනාසේ

ආදරේ රසේ ඒ තමා ලොවේ

නාඹර ප්‍රේමේ ජයකොඩි බන්දා

මේ ප්‍රේම කිරුළ ඔබේ හිසේ පළන්දා

ජීවාභිෂේකෙන් සැතපී විනෝදෙන්

විදිමු ජීවිතේ ඒ අමා සුවේ...

ගීත පබැදුම: සිසිර කුමාර මානික්කආරච්චි

ගැයුම: එච්.ආර්.ජෝතිපාල සහ ඇන්ජලීන් ගුණතිලක

තනු නිර්මාණය සහ සංගීතය: ෂෙල්ටන් ප්‍රේමරත්න

චිත්‍රපටය: ගැහැනු ගැට

අධ්‍යක්ෂණය: ජ්‍යෝතීශ් සිං සහ  ටී.සෝමසේකරන්

තිරගත වූ වසර1959

“ආලේ මිහිරපෙන්නා” ගීතය මෙතනින් අහන්න

කෙසේ වුවත් 60 දශකයේ ඉන්දීය චිත්‍රපට නිෂ්පාදකවරුන්ට මෙන්ම සංගීතඥයන්ටද,  සිංහල ගී ගැයූ ඉන්දීය ගායක ගායිකාවන්ටද,  රට තුළ විරෝධය මතු වූයේ ඉන්දීය ගායක ගායිකාවන් විසින් සිංහල චිත්‍රපටවල කැඩුණු සිංහලෙන් ගීත ගායනා කිරීම පිළිබඳවය.  එවකට මෙරට විසූ විචාරකයන්ගේ මතය වූයේ සියළුම චිත්‍රපට ගීත දේශීය ගායක ගායිකාවන් විසින් ගැයිය යුතු බව ය. මේ හේතුවෙන් ඉන්දියාවට ගොස් චිත්‍රපට නිෂ්පාදනය කිරීම තහනම් කිරීමේ නීති පනවන්නට එවකට පැවති රජයන්ට සිදුවිය.

ඒ හේතුවෙන් දේශීය චිත්‍රපට අධ්‍යක්ෂවරුන්  මෙන්ම සංගීත අධ්‍යක්ෂවරුන්  අතරද පිබිදිමක් ඇති විය. ඒ නිසාම දේශීය චිත්‍රපට නිෂ්පාදකවරු, අධ්‍යක්ෂවරු, සහ සංගීත අධ්‍යක්ෂවරු පිරිසක්ද මෙරට බිහි විය. මේ සංගීතඥයන්ට අනුකාරක කොපි ගීත කලාව  සමග ගැටෙමින් ස්වතන්ත්‍ර  නිර්මාණය කිරීමට සිදුවිය. මේ යුගයේම  චිත්‍රපට ප්‍රදර්ශනය ඇරඹීමත් සමගම චිත්‍රපටයේ ගී ඇතුළත් ගී පොතක් සිනමාහල් අසල විකීණීමත්, ඒ චිත්‍රපට ගීත ඇතුළත් ග්‍රැමෆෝන් ගී තැටි නිෂ්පාදනය වීමත්  බහුල වශයෙන් සිදුවිය.

ගුවන්විදුලියෙන් වාදනය වූයේ ද  චිත්‍රපට ගීත ඇතුළත් ග්‍රැමෆෝන් ගී තැටි ය. ඒ නිසා ම මේ ගීත බහුල වශයෙන් ජනතාව අතරට ගියේ ය. ඒවන විටත් ජෝතිපාල යන නම ජනතාව අතර මුල් බැසගත් වූ නමක් වී තිබිමත්, හොඳ නරක කුමක් වුවත්, ගී ඇසීමට ප්‍රිය කරන්නාවූ රසිකයෝ ජෝතිපාල ගැයූ මේ ගීත වලට තම පණ සේ ආදරය කිරිමට පෙළඹුණහ.

60 දශකය මැද භාගය වන විට බිහිව සිටි ෂෙල්ටන් ප්‍රේමරත්න, ආර්.ඒ.චන්ද්‍රසේන, මුත්තුසාමි, රොක්සාමි, අමරදේව, කේමදාස, ලයනල් අල්ගම, සිසිර සේනාරත්න ආදී සංගිතඥයන්ගේ සංගීත දායකත්වය කැපී පෙනෙන්ට විය.

සිසිර සේනාරත්න 

එහෙත් මෙකල්හි ජෝතිපාලට ගැයීමට වැඩියෙන්ම ලැබුණේ කොපි ගීත පමණි. ඒ සියල්ලක්ම ඉතාමත් ජනප්‍රිය ගීත බවට පත්විය. දේශීය ගායක ගායිකාවන් අතර  ජෝතිපාල සහ ඇන්ජලීන් අඩුවෙන්ම ස්වතන්ත්‍ර ගී ගැයූ ගායක ගායිකා යුවල විය.

ඒවන විටත් චිත්‍රපට පසුබිම් ගායකයකු සහ ගුවන්විදුලි ගායන ශිල්පියකු  ලෙස නමක් දිනා සිටි සිසිර සේනාරත්න “හඳපාන” චිත්‍රපටය සඳහා සංගීත අධ්‍යක්ෂණය කරමින් චිත්‍රපට සංගීතයට පිවිස සිටියේය.  සිසිරගේ සියළුම ගී තනු ස්වතන්ත්‍ර ගී තනු විය. ඒවා සියල්ලම ජනප්‍රිය ගී බවට පත්ව තිබුණි. සිසිර සංගීතය සැපයූ ‍ඔහුගේ දෙවන චිත්‍රපටය වූයේ ‘හිතට හිත” චිත්‍රපටයයි. එය තිරගත වූයේ 1965 දීය. චිත්‍රපටයේ ගිත 05 ක් තිබුණි. එක ගීයක් ගැයීමට සිසිර තෝරාගෙන තිබුණේ ජෝතිපාල සහ සුජාතා පෙරේරා ( සුජාතා අත්තනායක)  ගායක ගායිකා යුවලය.  සිසිර සංගීතය සැපයූ  “හිතට හිත” චිත්‍රපටයට ඔහු තැනූ මධුර ගී තනු අදට ද ජනප්‍රියය. ඒව වසර 45 කට වැඩි කාලයක් මෙරට ගීත ලෝලීන්ගේ තුඩ තුඩ රැව් දුන් ගීත බවට පත්ව තිබේ. ඒ නිසා සිසිර තනු හැදූ ජෝති -  සුජාතා ගැයූ මේ ගීය අපට දැනෙන්නේ අද ඊයේ ගැයූ ගීතයක්  සේ මය. ජෝති සුජාතා ගැයූ ඒ මධුර ගීය මෙයයි.

වන මලට ආශාවෙ වන බඹරා ආවා සේ

මම ප්‍රේමී ආවා සොයා... ඕ.. මේ.. ආවේ..

මද පවනේ සැනසිල්ලේ ඔබ තුරුලේ නැළැවිල්ලේ

මම මිහිර දෙන්නම් සදා

කුමුදිනිට සඳ වාගේ හැමදාම ඔබ මාගේ

මගේ පෙම් ලොවේ රාජයා... ඕ.. මේ.. ආවේ..

අතගන්න සැනසිල්ලේ නැළවෙන්න සුදු වැල්ලේ

ඔබ එන්නකෝ මා සොයා

පිළිගන්න මේ ආලේ දැන් නේද හොඳ කාලෙ

මනරංජනී වේ සුදා

ඔබ නේද සුර කෙල්ල පෙම් ලෝකේ ගිනි දැල්ල

රග දෙන්න මිහිරේ සදා

කුමුදිනිට සඳ වාගේ හැමදාම ඔබ මාගේ

මගේ පෙම් ලොවේ රාජයා... ඕ.. මේ.. ආවේ

සුවඳයි මලයි වාගෙ ඔබගෙයි මගෙයි ආලෙ

පවතීවා ලෝකේ සදා

පෙම් ලෝකෙ සිනමාවෙ රගපාන හැම වේලෙ

සුර සිහිනෙකි මේ සුදා...

ගීත පබැදුම: හර්බට් එම් සෙනෙවිරත්න

ගැයුම: එච්. ආර්.ජෝතිපාල සහ සුජාතා අත්තනායක

තනු නිර්මාණය සහ සංගීතය: සිසිර සේනාරත්න

චිත්‍රපටය: හිතට හිත

අධ්‍යක්ෂණය: කිංස්ලි රාජපක්ෂ

තිරගත වූ වසර  :1965

“වන මලට ආශාවෙ”ගීතය මෙතනින් අහන්න

මේ ආකාරයෙන් ජෝතිපාලගේ ආරම්භක දශකය තුළ ඔහුට ගැයීමට ලැබුණ ගීත අතර ස්වතන්ත්‍ර ගිත පහකටත් අඩු විය. ඒසේ වුවත් ඒ සියලු ගීත එක් සේ එදා මෙදා තුර ජනප්‍රියත්වයට පත් විය.  ඒසේ වුවත් ඒ ස්ව තන්ත්‍ර ගීත සියල්ලම වැටුණේ ජෝතිගේ කොපි ගීත ගොඩටය. මේ නිසා ජෝතිපාලගේ හැකියාව පිළිබඳ නිසි විචාරයක් කෙරුණේ නැත. ඒසේ විචාරයක් කිරීමට තිබුණ අවස්ථාවන් පවා මග හැරුණේ  ඔහු ගැයූ හින්දි සහ දෙමළ කොපි ගී තනුවල තිබූ මිහිර සංගීතය සහ ජෝතිගේ හ‍ඬෙහි තිබූ ඉන්දියානු ගායන ශෛලිය නිසා යැයි මට සිතේ.෴

ආශ්‍රිත ග්‍රන්ථ:

01.                         සිංහල චිත්‍රපට ගීතාවලිය -  මහාචාර්ය සුනිල් ආරියරත්න

02.                         සිංහල චිත්‍රපට ගීත සාහිත්‍යය  - සමන්ත හේරත්

03.                         ඉන්දියානු සිනමාවේ දහතුන් වන භාෂාව - සුනිල් මිහිදුකුළ

ඔබේ හිතේ ජෝතිපාල පිලිබඳව විචාරාත්මක අදහසක් හෝ මේ ලියූ දේ ගැන විචාරයක් ඇත්නම් ලියන්න. කැමති විදියට ලිවිමට ඔබට නිදහස ඇත.